سلمان خان کو بولی وڈ کا بھائی جان ایسے ہی نہیں کہا جاتا، وہ واقعی بولی وڈ کے بھائی ہیں۔ دو دہائی سے زائد عرصے سے بولی وڈ پر راج کررہے سلمان خان نے اپنے کیریئر میں کئی اتار چڑھاؤ دیکھے، ان کی زندگی کا سب سے زیادہ زیرِ بحث موضوع ان کی شادی رہا۔

لیکن آج ہم آپ کو سلمان خان کی شادی سے متعلق کچھ نہیں بتانے جارہے بلکہ ان اداکاروں کے بارے میں بتانے جارہے ہیں جنہوں نے سلمان خان سے پنگا لے کر اپنے کیریئر کو برباد کرلیا۔ ذیل میں ان اداکاروں کی فہرست ملاحظہ کریں۔۔

وویک اوبرائے

یہ بات تو سب ہی جانتے ہیں ایک دور میں سلمان خان اور ایشوریا رائے ایک دوسرے کے خاصے قریب تھے۔ تاہم دونوں کا تعلق چند وجوہات کی بناء پر تقویت نہ پاسکا اور علیحدگی ہوگئی۔ بعد ازاں جب ایشوریا اور وویک فلم 'کیوں ہوگیا نا' کی شوٹنگ میں مصروف تھے تو دونوں میں قربتیں بڑھنے لگیں۔

تاہم جب سلمان خان کو اس بارے میں علم ہوا تو وویک اوبرائے کے مطابق سلمان نے انہیں 42 مرتبہ کال کی اور نشے کی حالت میں خوب برا بھلا کہا اور گالیاں دیں۔ جس کے بعد وویک نے ایک پریس کانفرنس بلائی اور تمام واقعے کو میڈیا کے سامنے بیان کرنے اور سلمان خان پر ہراسگی کا الزام لگانے کی غلطی کردی۔

اس تمام واقعے نے سلمان خان کے کیریئر پر تو کوئی اثر نہ ڈالا مگر وویک کا کیریئر پستی کی جانب گامزن کردیا۔ بعد ازاں انہوں نے سلمان خان سے معافی بھی مانگی مگر سلمان نے انہیں معاف نہیں کیا۔

رنبیر کپور

سلمان خان کی زندگی میں آنے والی لڑکیوں کی فہرست بہت لمبی ہے انہی میں سے ایک کترینہ کیف بھی تھیں۔ لیکن کچھ عرصہ ساتھ گزارنے کے بعد کترینہ نے سلمان خان سے الگ ہوئیں تو وہ رنبیر کپور کے کافی قریب ہوگئیں۔ اطلاعات کے مطابق دونوں نے ڈیٹنگ بھی شروع کردی تھی۔ یہ بھی اطلاعات ہیں کہ سلمان خان نے اپنی بہن ارپیتا کی شادی کے موقع پر کترینہ کو خوب کھری کھری سنائی اور کہا کہ تم نے اپنا سرنیم خان میں تبدیل کرنے کا موقع ضائع کردیا اور کپور کو فوقیت دی۔

ارجیت سنگھ

ارجیت سنگھ نے سلمان خان کی میزبانی میں ہونے والے ایک ایوارڈ شو کے موقع پر سلمان خان کو کہا تھا کہ 'سلا دیا آپ لوگوں نے'۔ یہی نہیں شو کے دوران جب ارجیت کو ایوارڈ کے لئے بلایا گیا تو انہیں سوتے ہوئے بھی دیکھا گیا۔ شاید سلمان خان کو یہ بات ایک آنکھ نہ بھائی اور ارجیت نے بھی اس بات کو بھانپ لیا، اسی لئے انہوں نے بعد میں سلمان خان سے فیس بک پر معافی بھی مانگی لیکن سلمان خان کو اس قدر برا لگا کہ انہوں نے جواب دینا بھی گوارا نہ کیا۔ بعد ازاں ارجیت نے یہ پوسٹ اپنے فیس بک سے ڈیلیٹ کردی۔

رینوکا شاہانے

فلم 'ہم آپ کے ہیں کون' سلمان خان کے کیریئر کی بہترین فلموں میں سے ایک ہے۔ اس فلم میں رینوکا شاہانے نے سلمان خان کی بھابھی کا کردار ادا کیا۔ بھابھی دیور کی اس کیمسٹری کو ناقدین اور عوام نے خوب پسند کیا۔

حال ہی میں جب عدالت نے 18 سال پرانے کالا ہرن کیس کا فیصلہ سنایا تو رینوکا نے اس پر افسوس کا اظہار کیا۔ یہ کہا جارہا ہے کہ ان کی پوسٹ نے سلمان خان کو نہ جانے کیوں خوب غصہ دلادیا۔

زبیر خان

بگ باس کے گزشتہ سیزن میں زبیر خان سب سے زیادہ متنازعہ کنٹسٹنٹ تھے۔ ان کے بارے میں کہا جاتا ہے کہ انہوں نے شو پر اپنی غلط پہچان ظاہر کی تھی۔ ایک ایپیسوڈ کے دوران سلمان خان نے انہیں خوب جھاڑ پلائی، بات اس قدر آگے بڑھ گئی کہ سلمان نے انہیں شو سے نکل جانے کا کہہ دیا۔ زبیر نے کہا 'میں وویک اوبرائے نہیں ہوں، میں تیری بجاؤں گا، زبیر خان بھوکا رہے گا نہ تو اس کو کھلائے گا'۔ زبیر نے یہ بھی کہا تھا کہ وہ سلمان خان کے خلاف ایف آئی آر درج کروائیں گے مگر ایسا نہیں ہوا۔