بولی وڈ کے مشہوراداکار سلمان خان آج ضرور اچھا محسوس کررہے ہوں گے کیونکہ جمعہ کو ان کی ریلیز کی جانے والی فلم'ٹائیگر زندہ ہے' کو فلم بین بے حد پسند کررہے ہیں، وہیں اداکار کو خوش ہونے کی ایک اور وجہ مل گئی کیونکہ فوربس نے بھارت کی 100 مشہور شخصیات  فہرست شائع کردی ہے جس میں سلمان  خان پہلے نمبر پر ہیں۔  

فوربس کی جانب سے بھارت کے 100 سیلبرٹی کی فہرست ترتیب دی گئی ہے جس میں لسٹ گذشتہ سال اکتوبر سے رواں سال ستمبر تک ان کی فلموں اور انٹرٹینمنٹ سمیت دیگر شعبوں میں کمائی کو بنیاد بنایا گیا ہے۔

جبکہ فہرست میں دلچسپ بات یہ ہے کہ جہاں سلمان خان 232.83 کروڑ کما کر پہلے نمبر پر ہیں وہیں شاہ رخ خان 170.5 کروڑ کے ساتھ دوسرے نمبر پر ہیں۔

جی ہاں گزشتہ سال کی طرح اس بار بھی سلمان خان نے شاہ رخ خان کو فوربس کے جانب سے شائع کی گئی فہرست میں مات دے دی۔

واضح رہے کہ بھارت کے معروف بلےباز ویرات کوہلی اس فہرست مین تیسرے نمبر پر ہیں جبکہ اکشے کمار نے اپنی پوزیشن برقرار رکھتے ہوئے  فہرست میں چوتھا نمبر حاصل کیا۔

عامر خان نمبر چھ پر رہے جبکہ  پرینکا ساتویں نمبر پر رہی جس کے بعد  آٹھویں اور نویں پوزیشن ریتھک روشن اور رنویر سنگھ کے نام رہی۔

بشکریہ: بولی وڈ ہنگامہ