فلمی دنیا میں سلمان ، عامر اور شاہ رخ   تینوں خان  میگا اسٹارز کی حیثیت رکھتے ہیں اور تینوں کا کیریئر کم و بیش ایک وقت پر ہی شروع ہوا۔

عامر خان نے ایک  حالیہ انٹرویو میں بتایا کہ ان کی  سلمان اور شاہ رخ خان سے زندگی   میں پہلی ملاقات  کب اور کیسے ہوئی۔

عامر نے بتایا کہ ان کی دونوں سے ملاقات طے شدہ نہیں تھی بلکہ اچانک ہی وہ ان سے ملے۔

'پہلی بار میں سلمان سے ببلا(ہدایت کار ادیتیا بھٹا چریا) کے گھر ملا ،جنہوں نے 1989 میں فلم 'راکھ' بنائی تھی۔ اتفاق سے اُس سال میں اور سلمان ایک ہی  کلاس میں تھے لیکن ایک دوسرے کو نہیں جانتے تھے۔ اس وقت میں ببلا کے گھر موجود تھا اور ایک شارٹ فلم  'پیرانویا'پر ان سے بات چیت کررہا تھا جس میں  اسپوٹ بوئے، ای ڈی اور پروڈکشن ہیڈ تینوں کام میں ہی کرر ہا تھا'۔

'وہ شارٹ فلم ایک مہینے میں مکمل ہوئی۔ اُس وقت 15 سال  کی عمر میں میں نے پہلی بار اداکاری بھی کی تھی ۔ وہیں پہلی بار میں نے سلمان کو سائیکلنگ کرتےہوئے دیکھا۔ سلمان ببلا کو بھی جانتا تھا۔جس کے بعد میں نے اور سلمان نے پہلی بار بالکنی میں کھڑے ہو کر بات کی'۔

'سلمان نے بتایا کہ وہ ہمیشہ سےاداکاری کرنا چاہتے تھے۔ رہی بات شاہ رخ کی تو مجھے یاد ہے کہ ہماری ملاقات ایک سڑک پر ہوئی تھی جب میں جوہی چاؤلا کے ساتھ شوٹنگ کررہا تھا اور جوہی کے ساتھ ہی شاہ رخ کی نئی فلم 'راجو بن گیا جنٹل مین' کی شوٹنگ شروع ہونے والی تھی۔ یہ اس وقت کی بات ہے جب شاہ رخ کی ڈبیو فلم'دیوانہ' ریلیز  نہیں ہوئی تھی۔ ان سے ملتے ہوئے کافی اچھا لگاتھا'۔

یاد رہے کہ تینوں خان آج کل اپنی  نئی فلموں میں مصروف دکھائی دے رہے ہیں۔ عامر خان  یاش راج  کی 'ٹھگ آف ہندوستان' ، سلمان خان 'ٹائیگر زندہ ہے' اور 'ریس 3' میں جبکہ شاہ رخ خان  اآنند ایل رائے کی نئی فلم میں مصروف دکھائی دے رہے ہیں ،فلم میں شاہ رخ بونے کا کردار نبھائیں گے۔

بشکریہ:  زی نیوز