پاکستان کے لیجنڈری فاسٹ باؤلر اور سابق کپتان وسیم اکرم کے بہترین ہونے پر ایک اور اسٹیمپ لگ گئی۔ انہیں کرکٹ کی تاریخ کے بہترین باؤلرز میں شمار کیا جاتا ہے۔

تفصیلات کے مطابق ویسٹ انڈیز کے مایہ ناز بلے باز شیو نارائن چندرپال نے وسیم اکرم کو تاریخ کا سب سے بہترین باؤلر قرار دے دیا۔ شیونارائن چندرپال نے ویسٹ انڈیز کے لئے طویل عرصہ کرکٹ کھیلی، وہ ویسٹ انڈیز کی جانب سے ٹیسٹ کرکٹ میں دوسرے سب سے زیادہ رنز بنانے والے بلے باز ہیں۔

شیو نارائن چندرپال اپنے یونیک بیٹنگ اسٹائل کی وجہ سے خاصے مشہور ہیں انہوں نے طویل دورانیے کی کرکٹ میں ہر طرح کے باؤلر کا سامنا کیا لیکن جب ایک انٹرویو کے دوران ان سے پوچھا گیا کہ آپ کا سب سے پسندیدہ باؤلر کونسا ہے تو انہوں نے سوئنگ کے سلطان کا نام لیتے ہوئے انہیں سب سے بہترین قرار دیا۔

ان کا کہنا تھا کہ میں نے اپنے کیریئر کے دوران عظیم باؤلرز کا سامنا کیا جس میں وسیم اکرم مجھے سب سے بہترین لگے۔ انہوں نے وقار یونس، گلین میگرا اور شان پولک کو بھی زبردست قرار دیا۔ ان کا کہنا تھا یہ تمام باؤلرز ہی بہت اچھے تھے لیکن میری نظر میں وسیم اکرم دنیا کے سب سے بہترین باؤلر ہیں۔

یاد رہے وسیم اکرم نے ون ڈے کرکٹ میں 502 جبکہ ٹیسٹ کرکٹ میں 414 وکٹیں حاصل کر رکھی ہیں۔ وہ ون ڈے کرکٹ کی تاریخ میں 500 وکٹیں لینے والے دنیا کے پہلے باؤلر ہیں۔ لیجنڈری فاسٹ باؤلر اس وقت پاکستان سپر لیگ کی فرینچائز ملتان سلطانز کے ساتھ منسلک ہوگئے ہیں۔