ہر شخص اس بات سے بخوبی واقف ہے کہ سگریٹ پینا ایک بہت بری عادت ہے لیکن پھر بھی یا تو وہ دوسروں کو دیکھ کر اس عادت کو اپنا لیتا ہے یا پھر اس بری عادت کو فیشن کے طور پر اپنی زندگی کا حصہ بنا لیا جاتا ہے۔

اس بات سے بے خبر کہ سگریٹ جن اجزاء پر مشتمل ہوتی ہے ان میں سے ایک "ریٹ پوائیزن" بھی ہے جو انسانی کی صحت کے لئے انتہائی خطرناک ہے۔ تاہم اگر آپ سگریٹ نوشی کو خیرباد کہنا چاہتے ہیں تو ان دس طریقوں پر عمل کریں ان کی مدد سے بناء کسی علاج کے آپ سگریٹ چھوڑ سکتے ہیں اور اس بری عادت سے نجات حاصل کر سکتے ہیں۔

ان طریقوں پر عمل کرکے سگریٹ کو چھوڑا جاسکتا ہے۔

کہیں لکھ لیں کہ آپ سگریٹ کیوں چھوڑنا چاہتے ہیں اور اس سے آپ کو کیا فوائد حاصل ہوں گے

سگریٹ پینے کی بری عادت کو چھوڑنے کے لئے آپ کو ایک لسٹ ترتیب دینی ہوگی جس میں وہ تمام باتیں لکھیں کہ آپ سگریٹ کو کیوں چھوڑنا چاہتے ہیں اور اس سے آپ کی صحت پر کیا مثبت اثرات مرتب ہوں گے۔ ان کی کئی سادہ وجوہات ہوسکتی ہیں جیسے تیز دوڑ سکیں گے، دوبارہ گلوکاری کرسکیں یا مختلف چیزیں کھا سکیں۔ ان کو لکھ لیں اور روزانہ دیکھیں یہ تاکہ آپ کو یاد رہے یہ آپ کو اس بری عادت سے چھٹکارا حاصل کرنے  میں مدد دے سکتا ہے۔

ایک تاریخ مختص کرلیں اور دوسروں کو بھی اپنے اس اقدام سے آگاہ کریں

سگریٹ کو چھوڑنے کے لئے ایک تاریخ کا تعین کرلیں اور دوسروں کو بھی اپنے اس عمل سے آگاہ کریں تاکہ دوسرے بھی آپ کو اس بری عادت سے چھٹکارا دلانے میں مدد کرسکیں۔ جو تاریخ آپ نے مختص کی اسی دن سے اپنی تحریک کا آغاز کریں اور اپنے مقاصد پر توجہ رکھیں۔

ان تمام چیزوں سے بھی دور رہیں جو آپ کو سگریٹ کی یاد دلائیں

سگریٹ پینے کے لئے اسے جلانا بھی پڑتا ہے جس کے لئے عادی شخص یا تو اپنے پاس لائیٹر رکھتا ہے یا پھر ماچس۔ سگریٹ سے چھٹکارے کے لئے ان چیزوں کو بھی خود سے دور کردیں تاکہ دیکھ کر سگریٹ کی یاد نہ آجائے۔

ان سرگرمیوں اور جگہوں پر جانے سے بھی اجتناب کریں جہاں آپ سگریٹ پیا کرتے ہیں

ان سرگرمیوں میں بھی شرکت نہ کریں جو آپ کو سگریٹ کی طرف متوجہ کریں۔ ان دوستوں سے بھی کچھ دوری اختیار کریں جو سگریٹ پیتے ہوں اس کے علاوہ ان محفلوں میں جانے سے بھی اجتناب کریں جہاں سیگرٹ پینا عام ہو کیونکہ وہاں جانے سے آپ کو سگریٹ کی طلب پریشان کر سکتی ہے۔

جب سگریٹ کی طلب ہوتو نہا لیں

جب آپ اس بات کو محسوس کریں کہ اب سگریٹ کی طلب آپ کے کنٹرول سے باہر ہو رہی ہے تو سکون حاصل کرنے کے لئے نہا لیں کیونکہ نہانے سے ایسا ہی سکون حاصل ہوگا جیسا کہ سگریٹ پینے سے ہوتا ہے۔

وٹامن سے بھر پور غذا کا استعمال

سگریٹ سے دوری اختیار کرنے کے لئے وٹامن سے بھرپور پھلوں اور سبزیوں کو اپنی خوراک میں شامل کرلیں کیونکہ وٹامن جسم میں موجود نیکوٹین سے نجات دلاتے ہیں اور اس کی وجہ سے پھیپڑوں کو بھی نقصان سے بچایا جاسکتا ہے۔

ورزش کریں

اکثر سگریٹ پینے کے عادی افراد ورزش سے دور بھاگتے ہیں جس کی وجہ جلد ہی تھک جانا اور ہانپنا ہے۔لیکن ورزش ایک ایسی بہترین چیز ہے جس سے آپ کا پسینہ نکلتا ہے، آپ میں چستی پیدا ہوتی ہے اور دل کی دھڑکن بھی تیز ہوجاتی ہے جو آپ کے ذہن کو سکون فراہم کرتی ہے۔

لیموں کے جوس کا استعمال

یہ بات ثابت شدہ ہے کہ لیموں کے جوس اتنا ہی اثر رکھتا ہے جتنا نیکوٹین تمباکونوشی سے نجات حاصل کرنے میں مدد گار ثابت ہوتا ہے۔تو لیموں کے جوس کا استعمال یقینی بنائیں اور سگریٹ سے نجات پائیں۔

خود کو انعام سے نوازیں

آپ نے سگریٹ نوشی کو مسترد کرکے جو بھی پیسے بچائے ہیں ان سے کوئی نہ کوئی ایسی چیز خریدیں جو آپ کو اس چیز کا احساس دلائے کہ اگر شروع سے ہی سگریٹ نوشی نہ کرتا تو آج اس جیسی بہت سی چیزیں میرے پاس ہوتیں۔

پریشر پوائنٹس پر مساج کریں

کم سے کم ایک منٹ کے لئے اپنے جسم کے ان حصوں کو مساج کریں۔کیونکہ یہ آپ کو سگریٹ کی طلب نہیں ہونے دیں گے۔

٭شہادت کی انگلی اور انگوٹھے کے درمیان

٭کلائی کے اندرونی حصے میں

٭کلائی کے اطراف

٭اور ناک کے اطراف

نوٹ: یہ مضمون محض عام معلومات کے لئے ہے اس پر عمل کرنے سے قبل اپنے معالج سے مشورہ ضرور کیجئے۔