کراچی میں نیپئر روڈ پر نامعلوم افراد کی فائرنگ سے خاتون اور مرد جاں بحق ہوگئے، دونوں کا تعلق باجوڑ ایجنسی سے تھا اور کراچی میں گھر والوں سے چھپ کر رہ رہے تھے۔
پولیس حکام کے مطابق نیپر روڈ پر میوہ شاہ مسجد کے قریب فائرنگ سے ایک خاتون اور ایک مرد شدید زخمی ہوئے جنہیں فوری طور پر اسپتال منتقل کردیا گیا جہاں وہ زخموں کی تاب نہ لاکر چل بسے۔
بلوچستان سے قبائلی رہنما حاجی قاسم پانیزئی اغوا
پولیس ذرائع کا کہنا ہے کہ خاتون اور مرد رکشا میں کلفٹن سے آرہے تھے، ان کے تعاقب میں موٹر سائیکل سوار ملزمان بھی تھے، جوں ہی رکشا لی مارکیٹ میوا شاہ روڈ پہنچا تو رکشے سے اترتے ہوئے ملزمان نے ان پرفائرنگ کردی۔
جاں بحق ہونے والے مرد کی شناخت عطاءاللّٰہ کے نام سے ہوئی جبکہ خاتون کی شناخت نہیں ہوسکی۔
پولیس نے بتایا کہ دونوں کا تعلق باجوڑ ایجنسی سے تھا اور وہ کراچی میں گھروالوں سے چھپ کر رہ رہے تھے۔
جاں بحق ہونے والی خاتون پہلے سے شادی شدہ تھی، جبکہ مقتول عطاء اللّٰہ کے گھر والوں نے لاش لینے سے انکار کرتے ہوئے پولیس کو لاش کو لاوارث دفنانے کا کہہ دیا ہے۔
