پاکستان کے سابق مایہ ناز فاسٹ بولر شعیب اختر نے کورونا وائرس کے باعث جاری صورتحال میں بند دروازوں کے پیچھے پاک بھارت کرکٹ سیریز کے انعقاد کی تجویز دے دی۔

انہوں نے اپنے یوٹیوب چینل پر گفتگو کرتے ہوئے کہا کہ اس وقت دنیا بھر میں کھیلوں کی سرگرمیاں معطل ہیں اور ہمارے ممالک کی صورتحال بھی کافی خراب ہیں۔ ایسے میں اگر سیریز کا انعقاد ہوجائے تو 300 ملین کے قریب فنڈ اکھٹا کیا جاسکتا ہے۔

انہوں نے کہا کہ اس سیریز سے آنے والی کمائی کو آدھا آدھا تقسیم کرلیا جائے اور اس پیسے کو خدمت خلق میں صَرف کیا جائے۔

انہوں نے مزید کہا کہ میری تجویزپر عمل کرتے ہوئے اس سیریز کا انعقاد ہوجائے تو کافی پیسا بنایا جاسکتا ہے اور کئی جانوں کو بچایا جاسکتا ہے۔

شعیب اختر نے یہ بھی کہا کہ اگر اس سیریز کا انعقاد ہوجائے تو یہ تاریخ کے سب سے زیادہ دیکھے جانے والے میچز بن سکتے ہیں کیونکہ اس وقت دنیا بھر کے تقریباً ممالک میں لاک ڈاؤن ہے اور عوام اپنے گھروں میں بیٹھی ہوئی ہے۔

سابق فاسٹ بولر نے شاہد آفریدی فاؤنڈیشن کو سراہنے پر یووراج سنگھ اور ہربھجن سنگھ کے ساتھ ہونے والے سلوک پرافسوس کا اظہار کیا اور کہا کہ یہ بیماری ہندو یا مسلمان نہیں دیکھتی، اس صورتحال میں ہمیں ایک دوسرے کو بیک کرنا چاہیئے۔