پاکستان اور بنگلادیش کرکٹ بورڈز کے سربراہان کی رواں ہفتے ہونے والی ملاقات بنگلادیشی ٹیم کے دورہ پاکستان کے مستقبل کا فیصلہ کرے گی۔

بنگلادیش کرکٹ بورڈ کی جانب سے پاکستان میں ٹیسٹ کھیلنے سے انکار کے بعد پی سی بی نے بنگلادیش کو منانے کی کوششیں تیز کردیں۔ چیئرمین احسان مانی رواں ہفتے بی سی بی کے صدر نظم الحسن سے دبئی میں ملاقات کریں گے۔

ملاقات آئی سی سی گورننس ریویو کمیٹی کی سائیڈ لائنز پر ہوگی، پی سی بی کے مطابق احسان مانی اور نظم الحسن کی ملاقات کے بعد بنگلادیش کرکٹ ٹیم کے دورہ پاکستان سے متعلق مزید تفصیلات سےآگاہ کیا جائے گا۔

بی سی بی نے گزشتہ روز پاکستان میں ٹیسٹ سیریز نہ کھیلنےکا فیصلہ کیا تھا۔

بی سی بی کے صدر کے مطابق ان کی حکومت نے مشرق وسطی کی موجودہ صورتحال کے پیش نظر ٹیم کو زیادہ عرصے پاکستان میں قیام نہ کرنے کا مشورہ دیا ہے۔