ہالی ووڈ کے مشہور پروڈیوسر ہاروی وائن اسٹین نے اُن درجنوں خواتین سے مبینہ طور پر ڈھائی کروڑ ڈالر میں تصفیہ کرلیا جنہوں نے اُن پر جنسی ہراسگی کا الزام عائد کیا تھا۔

خواتین کی ایک وکیل نے بدھ کے روز خبر رساں ادارے سے گفتگو میں بتایا کہ بدنام زمانہ ہالی وڈ پروڈیوسر نے جنسی بدکاری کا الزام لگانے والی درجنوں خواتین سے ڈھائی کروڑ ڈالر (جو تقریباً 3 ارب 87 کروڑ 62 لاکھ 50 ہزار روپے بنتے ہیں) میں صلح کی ہے۔

ہالی وڈ پروڈیوسر نے جنسی ہراسانی کے الزامات لگانے والے افراد سے ڈھائی کروڑ ڈالرز کا معاہدہ کیا ہے۔ اس معاہدے کے تحت نا تو ہاروی کوئی بھی غلط کام قبول کریں گے اور نا ہی کوئی اور جرمانہ ادا کریں گے۔

وائن اسٹین پر جنسی ہراسانی کا الزام لگانے والوں میں انجلینا جولی، گوین پالٹرو اور سلمیٰ ہائیک جیسی اداکارؤں کے نام بھی شامل ہیں لیکن ان میں سے کوئی بھی اس کارروائی کا حصہ نہیں ہے۔

واضح رہے کہ ہاروی وائن اسٹین وہ نام ہیں جن کے اسکینڈل نے جنسی جرائم کے خلاف #MeToo  تحریک کو جنم دیا۔