لاہور: لاہور ہائیکورٹ نے چوہدری شوگر مل کیس میں مریم نواز کی ضمانت پر فیصلہ سنا دیا، مریم نواز کی ضمانت منظور کر لی گئی۔
جسٹس علی باقر کی سربراہی میں دو رکنی بینچ نے چوہدری شوگر ملز کیس کا فیصلہ سنایا۔ عدالت نے ضمانت کے عوض ایک، ایک کروڑ کے دو مچلکے جمع کرانے کا حکم دیا ہے۔
نیب نے مریم نواز کو 8 اگست کو اپنے والد نواز شریف سے ملاقات کے دوران کوٹ لکھپت جیل سے گرفتار کیا تھا جب کہ چوہدری شوگر ملز کیس میں ان کے کزن یوسف عباس بھی گرفتار ہیں۔
خیال رہے کہ مریم نواز نے 24 اکتوبر کو والد نواز شریف کی تیمار داری کے لیے ضمانت کی درخواست دائر کی تھی جس پر عدالت نے 31 اکتوبر کو فیصلہ محفوظ کیا گیا تھا۔
نیب پراسیکیوٹر جہانزیب بھروانہ نے مریم نواز کی ضمانت کی مخالفت کی تھی جب کہ امجد پرویز ایڈوکیٹ نے انسانی ہمدردی کی بنیاد پر ضمانت دینے کی استدعا کی تھی۔
