لاہور کی احتساب عدالت نے زمین کی غیر قانونی الاٹمنٹ کے کیس میں جنگ اور جیو کے ایڈیٹر انچیف میر شکیل الرحمٰن کا بارہ روزہ جسمانی ریمانڈ منظور کرلیا۔

احتساب عدالت نے میر شکیل الرحمٰن سے ہونے والی تفتیش سے متعلق رپورٹ بھی پچیس مارچ کو پیش کرنے کا حکم دے دیا۔

قومی احتساب بیورو نے جنگ جیو گروپ کے مالک میر شکیل الرحمان کو لاہور کو احتساب عدالت میں پیش کیا۔

عدالت نے فریقین کے دلائل سننے کے بعد میر شکیل الرحمان کا 11 روزہ جسمانی ریمانڈ دیا تاہم میر شکیل کے وکیل اعتزاز احسن نے ریمانڈ ایک روز مزید  بڑھانے کی استدعا کرتے ہوئے کہا کہ 24 مارچ کو مصروفیت کے باعث عدالت میں پیش نہیں ہوسکتے

بعدازاں عدالت نے میر شکیل کے ریمانڈ میں ایک روز کی مزید توسیع کرکے 12 روزہ ریمانڈ پر نیب کے حوالے کردیا۔

میر شکیل الرحمٰان سے ہونے والی تفتیش سے متعلق رپورٹ بھی 25 مارچ کو پیش کرنے کا حکم دے دیا۔

واضح رہے کہ گزشتہ روز نیب نے غیر قانونی اراضی کیس میں جنگ وجیو گروپ کے مالک میر شکیل الرحمان کو گرفتارکیا تھا، میر شکیل الرحمان پر 1986 میں اس وقت کے وزیراعلیٰ نوازشریف سے 54 کنال اراضی سیاسی بنیادوں پر لینے کا الزام ہے۔