کراچی ٹیسٹ میں سری لنکا کیخلاف پاکستان کی پوزیشن مستحکم ہوگئی، قومی ٹیم نے تیسرے روز کھیل کے اختتام تک 2 وکٹوں پر 395 رنز بنا کر مہمان ٹیم پر 315 رنز کی برتری حاصل کرلی۔

پاکستانی اوپنرز نے ٹیم کو 278 رنز کا عمدہ آغاز فراہم کیا۔ عابد علی نے 174 اور شان مسعود نے 135 رنز کی شاندار اننگز کھیلی، کپتان اظہر علی نے 13 اننگز بعد نصف سنچری اسکور کی۔

پاکستان کی جانب سے اس وقت وکٹ پر کپتان اظہر علی 57 اور بابر اعظم 22 رنز کے ساتھ موجود ہیں۔ سری لنکا کی جانب سے گرنے والی دونوں وکٹیں فاسٹ بولر لاہیرو کمارا  نے اپنے نام کیں اس کے علاوہ کوئی بھی گیند باز کامیابی حاصل نہ کرسکا۔

کراچی ٹیسٹ: سری لنکا 271 رنز پر آؤٹ، پاکستان کے دوسری اننگز میں 57 رنز

پاکستان اور سری لنکا کے درمیان کراچی ٹیسٹ کا دوسرا روز ایکشن سے بھرپور رہا، سری لنکن ٹیم اپنی پہلی میں 271 بناکر آؤٹ ہوئی تو پاکستانی اوپنرز نے ذمہ داری کا مظاہرہ کرتے ہوئے دوسری اننگز میں بنا کسی نقصان کے 57 رنز بنالئے، آئی لینڈرز کی برتری ختم کرنے کیلئے مزید 23 رنز درکار ہیں۔

پاکستانی اوپنرز عابد علی اور شان مسعود بالترتیب 32 اور 21 رنز کے ساتھ وکٹ پر موجود ہیں اور کل صبح اپنی بیٹنگ جاری رکھیں گے۔

اس سے قبل سری لنکا کی ٹیم پاکستان کی پہلی اننگز کے 191 رنز کے جواب میں 271 رنز بناکر آؤٹ ہوئی، دنیش چندیمل 74 اور پریرا 48 رنز بناکر نمایاں رہے۔ پاکستان کی جانب سے شاہین شاہ آفریدی نے 5 اور محمد عباس نے 4 وکٹیں اُڑائیں۔

کراچی ٹیسٹ کا دوسرا روز ایکشن سے بھرپور رہا۔ میتھیوز، ڈی سلوا اور ڈک ویلا جلد پویلین لوٹ ے لیکن دنیش چندیمل اور پریرا نے ذمہ دارانہ بیٹنگ کرتے ہوئے اپنی ٹیم کو پہلی اننگز میں 80 رنز کی برتری دلائی۔

کراچی ٹیسٹ کے پہلے روز بولرز کا راج رہا، کُل 13 وکٹیں گرگئیں