راولپنڈی: پاکستان کرکٹ بورڈ کے چھوٹے ملازمین معاشی مشکلات کا شکار ہوگئے، نوکری جانے کے غم میں راولپنڈری ریجن کے کیوریٹر واجد حسین انتقال کرگئے جس پر پی سی بی نے اظہار افسوس کیا ہے۔

پاکستان کرکٹ بورڈ کی بے حسی چھوٹے ملازمین پر قہر بننے لگی، ملک بھر سے ڈھائی سو ملازمین کو بغیر تنخواہ دیئے فارغ کردیا۔

نوکری سے فارغ ہونے والے ملازمین میں راولپنڈی ریجن کے کیوریٹر واجد حسین بھی شامل تھے جنہیں دل کا دورہ پڑا اور وہ دار فانی سے کوچ کرگئے۔ انہیں تین ماہ تنخواہ ادا نہیں کی گئی تھی۔

افسوسناک خبر کے بعد پی سی بی کو ہوش آیا، ترجمان کے مطابق ایک دو روز میں تنخواہیں جاری کردی جائیں گی اور واجد حسین مرحوم کیلئے جو کرسکتے ہیں وہ کریں گے۔