سڈنی: قومی کرکٹ ٹیم نے دورہ آسٹریلیا کا فاتحانہ آغاز کرتے ہوئے ٹی ٹوئنٹی ٹور میچ میں کرکٹ آسٹریلیا الیون کو 6 وکٹوں سے ہرادیا، پاکستان اور آسٹریلیا کے درمیان پہلا ٹی ٹوئنٹی اتوار کو کھیلا جائے گا۔

گرین شرٹس کا دورہ آسٹریلیا کا فاتحانہ آغاز ٹی ٹوئنٹی ٹور میچ میں 6 وکٹوں سے فتح سمیٹ لی، سڈنی میں کھیلے گئے میچ میں پاکستانی بولرز کی نپی تلی بولنگ کے باعث کرکٹ آسٹریلیا الیون 6 وکٹوں کے نقصان پر 134 رنز بناسکی۔

نیتھن میک سوینی 30 رنز بناکر نمایاں رہے جبکہ پاکستان کی جانب سے شاداب خان نے تین، وہاب ریاض، عماد وسیم اور محمد عرفان نے ایک ایک وکٹ حاصل کی۔

ہدف کے تعاقب میں پاکستانی اوپنرز بابر اعظم اور فخر زمان نے 78 رنز کا عمدہ آغاز فراہم کیا، بابر 34 اور فخر 43 رنز بناکر آؤٹ ہوئے۔

حارث سہیل نے 22 گیندوں پر 32 رنز کی اننگز کھیلی، پاکستان نے ہدف 18 ویں اوور میں باآسانی 4 وکٹوں کے نقصان پر پورا کرلیا۔

شاداب خان کو 4 اوورز کے کوٹے میں 30 رنز کے عوض تین وکٹیں حاصل کرنے پر میچ کا بہترین کھلاڑی قرار دیا گیا