واشنگٹن: امریکی فوج کی جانب سے کئے گئے حملے میں داعش سربراہ ابو بکر البغدادی مارا گیا ہے۔ عراق کے سرکاری ٹی وی نے اتوار کو بغدادی پر امریکی حملے کی ایک فوٹیج جاری کی ہے۔

فوٹیج میں دیکھا جاسکتا ہے کہ بم دھماکے سے زمین میں ایک بڑا گڑھا بنا ہوا ہے اور اس کے پاس ہی خون میں لت پت کپڑوں کے ٹکڑے بکھرے نظر آئے۔

ٹی وی رپورٹ میں دعویٰ کیا گیا کہ امریکی حملے میں بغدادی کی موت ہوگئی ہے اور یہ کپڑے بغدادی کے ہیں۔

فوٹیج میں اس جگہ کو بھی دکھایا گیا جہاں امریکی فوج نے گزشتہ رات بم برسائے۔ یہ فوٹیج دن کے وقت کا ہے۔

Iraqi state TV airs footage of raid on Baghdadihttps://t.co/9I5dA0fB3k pic.twitter.com/qnGr38vi82

— Yeni Şafak English (@yenisafakEN) October 27, 2019

فوٹیج میں ایک ایکسپرٹ کے حوالے سے بتایا گیا ہے کہ عراقی خفیہ ایجنسیوں کی مدد سے بغدادی کی جگہ ٹریس کی گئی تھی۔

ایک سینئر امریکی ڈیفینس افسر اور ایک دیگر ذرائع کے حوالے سے سی این این کی رپورٹ میں بتایا گیا ہے کہ بغدادی کی موت کی تصدیق ہونی ابھی باقی ہے۔ حالانکہ ڈی این اے اور بایو میٹرک جانچ پوری ہوچکی ہے ۔ ایک ڈیفینس افسر کے حوالے سے یہ بھی کہا گیا ہے کہ بغدادی نے حملہ کے دوران خود کو اڑا لیا۔

ایک امریکی افسر نے نام نہ بتانے کی شرط پر رائٹرس کو بتایا کہ بغدادی کو رات میں نشانہ بنایا گیا تھا۔ لیکن یہ ابھی کنفرم نہیں ہے کہ آپریشن کامیاب تھا یا نہیں۔ حالانکہ دو عراقی سیکیورٹی ذرائع اور دو ایرانی افسران نے کہا ہے کہ انہیں شام سے بغدادی کے مارے جانے کی مصدقہ اطلاعات ملی ہیں۔