فیصل آباد: عماد وسیم کی ناردرن اور حارث سہیل کی بلوچستان نے فیصل آباد میں جاری نیشنل ٹی ٹوئنٹی کپ کے فائنل کیلئے کوالیفائی کرلیا، دونوں ٹیموں نے دلچسپ مقابلے کے بعد سیمی فائنلز میں کامیابی سمیٹی، حتمی معرکہ جمعرات کو کھیلا جائے گا۔

نیشنل ٹی ٹوئنٹی کپ کے پہلے سیمی فائنل میں عثمان شنواری نے 5 وکٹیں لیں، ناردرن کی ٹیم 148 رنز بناسکی۔ جواب میں خیبرپختونخوا حاوی نظر آئی پھر اچانک بیٹنگ لائن لڑکھڑا گئی اور آخری اوور میں 8 رنز نہ بن سکے۔

آخری اوور میں حارث رؤف نے تین وکٹیں لے کر بازی پلٹ دی اور 3 رنز سے ناردرن نے میدان مارا۔

دوسرا سیمی فائنل ہائی اسکورننگ رہا، شعیب ملک اور محمد حفیظ نے نصف سنچریاں داغ دیں اور جنوبی پنجاب نے 173 رنز بناڈالے۔

تعاقب میں بلوچستان نے خوب مقابلہ کیا اور بات آخری اوور میں 18 رنز پر آگئی، عماد بٹ نے آخری اوور میں عمید آصف کو 2 چوکے اور 2 چھکے لگاتے ہوئے بلوچستان کو فائنل میں پہنچادیا۔