لاہور کے دورے پر آئے شہزادہ ولیم اور شہزادی کیٹ مڈلٹن نے مصروف دن گزارا۔ شاہی مہمان ایس او ایس ولیج، نیشنل کرکٹ اکیڈمی، بادشاہی مسجد اور شوکت خانم اسپتال گئے۔ دونوں مہمان بچوں اور کھلاڑیوں سے گھل مل گئے اور کرکٹ بھی کھیلی۔

 خصوصی طیارے کے ذریعے لاہور پہنچنے کے بعد شاہی مہمانوں کو فیروز پور روڈ پر ایس او ایس ویلیج لے جایا گیا۔ یتیم و بے سہارا بچوں کیلئے یہ دن یادگار بن گیا۔ شاہی مہمانوں نے بچوں سے ملاقات کی اور ادارے میں رہنے والے بچوں کی سالگرہ کا کیک بھی کاٹا۔

شہزادی کیٹ مڈلٹن نے بچوں کو ان کی سالگرہ پر اردو میں مبارکباد دی اور اپنے دورہ پاکستان کے حوالے سے جذبات کا بھی کھل کر اظہار کیا۔

نیشنل کرکٹ اکیڈمی پہنچنے پر چئیرمین پی سی بی احسان مانی نے معزز مہمانوں کا استقبال کیا۔ دونوں مہمانوں نے نمائشی میچ میں بھی شرکت کی جس کے کھلاڑیوں میں حسن علی، اظہر علی، شاہین آفریدی، ثنامیر، عروج فاطمہ اور عائشہ ظفر بھی شامل تھے۔

 بادشاہی مسجد آمد پر خطیب عبدالخبیر آزاد نے شاہی جوڑے کا استقبال کیا، برطانوی شاہی جوڑے نے بادشاہی مسجد کے مختلف حصے دیکھے اور قرآن پاک کی تلاوت بھی سنی۔ اس موقع پر شہزادی کیٹ مڈلٹن نے احتراماً سر پر دوپٹہ بھی لیا۔

 ایک روزہ دورے کے آخر میں پرنس ولیم اور کیٹ مڈلٹن شوکت خانم ہسپتال پہنچے۔ دونوں نے کینسر سے متاثرہ بچوں کے ساتھ وقت بھی گزارا اور اسپتال میں جدید ترین ٹیکنالوجی کی حامل ریڈی ایشن مشین کے شعبے کا دورہ کیا۔

ایک روزہ دورہ مکمل ہونے کے بعد شاہی مہمان واپس اسلام آباد روانہ ہوگئے۔