کراچی: قائد اعظم گولڈ کپ ہاکی ٹورنامنٹ میں نیشنل بینک نے واپڈا کو تین کے مقابلے میں چار گول سے شکست دے دی۔ حبیب بینک، پورٹ قاسم،اور اسٹیل ملز کی ٹیموں نے بھی اپنے اپنے میچز جیت لیے۔ ہاکی کلب آف پاکستان اسٹیڈیم کراچی میں کھیلے جانے والے میچ میں نیشنل بینک اور واپڈا کے درمیان مقابلہ پہلے ہاف میں دو دو گول سے برابررہا۔ نیشنل بینک کے یاسر شبیر نے دو جبکہ محمد عتیق اور محمد ندیم نے ایک گول اسکور کیا۔

واپڈا کی جانب سے پنالٹی کارنراسپیشلسٹ سہیل عباس نے طویل عرصے بعد ڈومیسٹک ایونٹ میں حصہ لیا انہوں نے دوگول کیے لیکن وہ اپنی ٹیم کو جتوانے میں ناکام رہے۔ ایک اور میچ میں حبیب بینک نے پاکستان کسٹمز کی ٹیم کے خلاف پانچ تین سے کامیابی حاصل کی۔ پورٹ قاسم نے پنجاب کو دو کے مقابلے میں چار گول سے مات دی۔ جبکہ اسٹیل ملز نے سندھ کو آٹھ گول سے آوٹ کلاس کیا۔